Barscheter Kerwespruch 1934

Wir grüßen Euch von nah und fern,

heut soll das hohe Fest gefeiert wern.
Vergeßt die Sorgen, lasst den Frohsinn walte,

heute woll’n wir fröhlich sein, heute werd Kerb gehalte!

Alles ist aus Rand und Band,

selbst die Gäst vum Hinnerland.

Mer wolle Euch nit vill verzeehle, mache aach ko Fratze,

denn alles dreht sich heitzutag, doch bloß um die Batze!

Drum gefuttert unn gezecht, denn mer soll doch denke,

ihr loßt ihn Barsched aach emool was hänke!

Unserm Metzjer sei Brotworscht sein heit extra lang Stängel,

es seinere debei, so lang wie en Wellebengel!

Kottlet un Schnitzel dufte ganz famos,

sei heit wie en Abtrittsdeckel groß!

Aach unser Bäcker, do unne unn owwe am Eck,

hawwe Kuche gebacke un kräftiche Weck!

Sonst is jo nit vill an so eme Weckelche,

mer steckt se bequem ins Westesäckelche.

Aach unser Wert sein heit gut verzollereert,

denn diesmool is de Wei iwwerhaupt nit geschmeert!
Sonst konnt’s jo allemool meechlich sei,

deß die Wasserleitung rauscht in des Spundloch enei!

Nach alter deutscher Sittenart,

die wir erhalten und treu auch stehts bewahrt,

ragt unsern schlanke Kerwebaum

weit hoch in den Weltenraum.

Drum Ihr Musikante, packt Eier Hörner jetzt,

unn bloost en Dusch vor unser Kerwegäst!

So schließ ich dann mein Einleitungsprolog
unn die Kerwegäst, sie leben dreimal Hoch! Hoch! Hoch!

Eich sein jo noch nit fertig, ich verzeehle weiter,

des ihrs wisst: Der Kerwerummel der ist bei de Witwe Schneider.

Das sich kaaner errt: Karlche hasst de Sonnewert.

Der ist kerngesund an Herz, Lewer, Lung.

bloß horre en schlecht Zung!

Desweeche hunn mer uns nicht scheniert,

unn sei Kerwewei selwer probiert!

Frisch gewachst ist aach der Saal,

do mechts des Tanze aach kaa Qual!

Fei gewischt ist Küch un Keller
unn aach gibt’s was uff de Deller!

Vergesse will ich nit ze saache,

beim Schluß est Keesebrot, des beschließt de Maage!

Immer den Punkt do hall ich jetzt mei Gusch,

auf Ihr Musikante, dem Sonnewert en Dusch! – V i v a t!

Als nächster Punkt, es i kaan Spott unn Hohn,

kimmt die Verlobungssensation!

Waschlovor, Servic unn Uhr
gewinnt vor 20 Pfennich nur.
Jedes Los gewinnt zwar nit,

die Nirer leie menanner in de Mitt.

Ihr braucht aach nit gleich haam zu laafe,

duht erscht dene Bosch ihr Lose kaafe!

Unser Veranstaltung die soll gut gelinge,

Ihr Musikante, loßt en Dusch erklinge! –

Nun schwenk ich iwwer uff unser nette Leitcher,

des sein do unser Kerwebräutcher.

Bäckelcher hunnse wie die Hängelkersche

unn trillern duhnse wie die Lerche.

Krausgelockt de Buwikopp,

aach ab unn zu en Hängezopp.

Die Röckelcher länger, die Söckelcher kerzer
lauter scheene junge Herzier!
Treu wie Gold unn e gut Gemiet,

seht zu Ihr Musikante, dass ern Dusch vor se krieht! – V i v a t!

Aach vergesse will Eich nit Ihr Kerweborsch,

de Mathes, de Kunnrad, de Seppel unn de Schorsch.

Met Schnawwelschuh und Biegelfalte,

werd in Barschet Kerb gehalte.
Jhr liewe Leit, was gilt die Wett:
statt Kraache trage se am Hals en Manschett.

Des gefällt de Marie unn de Bett,

so was fine se aach ganz nett.

En Schnorres kennese jo noch kaan dreh,

do miste se erscht die Hoohr verleh;

bei manchem sieht man kaum
unner des Noos de Kerweflaum!

Trotzdem sein se kreizfidel,

de Wersching glänzt von Kletteworzelöl.

Met em Scheerboot hunn se gedreht ihr Worschtfettlocke,

drumm ihr Meedcher kennt euch ruhich never se hocke!

So will ich scheije von dem Druck
unn nemm vom Mundschenk en große Schluck.

Awwer jetzt Ihr Musikante … rasche:

Bloost de Kerweborsch en Marsch! – V i v a t! H u r r a!

Meil mer grad am Hechele sei,

fällt mer grad de Borjemaaster ei;

den hätte mer hawwe misse gleich
in unserm Dritte Reich!

In alle Fächer isser korrannt,

selbst die Arbeitslosigkeit er bannt!

Hinnerm Nussbaum ragt stolz in die Höh’
en funkelnagelnaues Säustallpallee (Palais).

Die Berjer brauchen allesamt,

den Vorsteher vun dem Standesamt.

Zu beneide is er nit, des werde jeder bekunde,

in so eme klaane Nest hott der die bitterste Stunde.

Vor uns awwer is er en Mann von echtem Schrot und Korn,

wohl bei manchem annern im Aaach en Dorn.

Trotz allem lässt er sich nit verdrieße,

uff sei Wohl e Glas sich jetzt enunner zu gieße.

Grad weil unser Borjermaaster sei Pflicht treu erfüllt,

krieht er aach aan uffgespillt.

Unn ich ruf – des Barsched muß bebe:

Hoch soll unsern Borjermaaster lebe! – V i v a t

Schließlich is do noch zu erwähne,

was mer vun de alt Vertretung do meene:

Se kunnte sich aach nit mieh halle,

sinn samt dem alte Schulze unnern Disch gefalle!

Vill Köpp - vill Sinn,

unn brachte desweeche aach nix hin!

Jetzt sein se re vier, manchmool nor drei,

und doch is die Sach jetzt ganz in de Reih!

Weil alles so klappt,

drum Mundschenk gezappt!

Musikante sticht uff,

unn macht de nei Führung aan druff! – V i v a t!

Unser Felschütz ist fierwahr,

e tücht’ger Ker, des is doch klar;

zwar is bei uns nix mieh ze hole,

drum wird aach hier nix mieh gestohle!

Deshalb kann er aach so gut des Schützenamtes walten,

drum wird er aach wohl beibehalten.

Aach unser Feierwehr met samt ihrm Kommandant,

schafft jetzt met de Bärjerschaft bloß Hand in Hand,

gut wars, des es dies Johr noch nit hott gebrennt,

sonst hätt die ganz Feierwehr geschennt;

denn met was sollte se dann lösche,

mer harre jo kaa Wasser vor sich ze wäsche?!

Drum weil mer nix ze wäsche ho
misse se an de Fußdienst ro

- - halb links – halb rechts!
die Feierwehr is noch lang nit die schlechst!

Drum Musikante vor de Schütz unn die Wehr
emool schnell en Dusch eheer! – V i v a t!

De Bauersleit werds Angst unn Bange,

de Förschter mischt de Wald zu mit Trudern und Stange,

beklage duhn se sich sehr,

iwwer so en groß Malheur.

De Wald is so schon leer,

mer hawwe bald kaa drittklassige Stange mehr!

Unser Förschter seeht: des hott schon Zweck,

des wird jo bloß weeche de Reh unn de Böck,

die Reh duhn alles vertrampele,

drum misse mer gut verrammele!

Die Bauern hunn sich besonne eriwwer unn eniwwer,

unn zum Schluß springe die Böck doch owwe driwwer!

Wie mer so heert
is vor de Förschter en Waldpark ganz begehrt,

mit seim Auto fährt er dann jeden Daach gucke,

bis die Bauern nit mieh driwwer mucke.

Mir gewwe awwer nix vor so Bosse,

drum werds aach mit dem Dusch gelosse.

Mundschenk, du treu Seel,

ich begieße emol mei Kehl!

Edler Trunkt – biste noch hell oder trübste, -

Prost – mit dir trink ich am liebste!

Unser Gemaarechner, des is erscht en Mann,

Ihr glaabts nit, was der so gut rechne kann;

Er rechent hie, er rechent her
unn seitdem hott er kaa Defizit mehr!

Letzthie, do wards laut:

Do hott er en groß Scheuer gebaut.

Nix hott er vergesse,

de Handwerker jeden Quadratmeter nochgemesse.

Seim Name micht er gar Ehr,

wenn nor de spitz Winkel nit wär.

Nit gewend is er unn nit gewiche
unn hot jedem an de Rechnung was gestriche.

Wenn er aachs uffs Rechne nit so verpicht,

es zwingt ihn halt die eiserne Pflicht:

Steierzettel schreibt er wie en Handtuch so lang,

jeden nimmt er unner de Steierzwang.

Awwer jetzt Musikante emmool blooster

Vor unserem Barscheder Rechenmooster! – V i v a t!

In Hause inn eme Haus ohne Balkon
do wohnt drinn e Respektsperson;

Sie mischt ihrn Dienst zu Fuß, fährt aach emool Chaische;

Ich will’s euch saache. Es is unser Ammebäsche

Und wenn se sitzt im Hallechje
uff em Schoß ihr Tächje,

kimmt se grad zu de richtige Zeit,

denn dann is de Klapperstorch nit weit.

Des Ammebäsche duht sich beklage

´s deht selten jemand nach ihr frage.

Denn dodrinn hot Barsched kaan gute Name,

de Dokter meent, es läh am schlechte Same!

Drum Ihr Meedcher unn Borsch:
macht Eich als bekannt mit em Klapperstorch,

denn, wenn die Geburtegang gieht zerick,

is besiegelt de Barscheder ihr Geschicht!
Sechs Dutzend misse’s nächst Johr uff die Baa,

drum Alt un Jung halt Eich draa,

unn macht ihrs so wie ich es Euch beschreiwe,

dann könnters noochher werre langsamer treiwe!
Wenn alles so wird, wie ich’s Eich saa,

kann auch die Ammegoot en Dusch verdraa!

Bei all dem groß Geschrei,

kummt jetzt buntes Allerlei.

- Es ist fast nit zu glaawe,

en Schwimmbad hott mer hier gegraawe,

am Fuß vom Barscheder St. Gotthardtberg
do bade sich die Buwe, Mädcher unn die Zwerg.

Wenn aaner do enei springt, der meent, er wär dreckig,

do kimmt er eraus ganz schleimig unn fleckig.

Raus zu merkt mer en groß Gezappel,

do hott mer merschtens en Worm uff em Nawwel.

Frösch und Kröte mache Konzert,

hinne am Ausgang unn vorne vor de Pfört..

Die Owrigkeit saaht, des weern kaa Sache,

die Ortsbehörde solle en Mauer drumm mache.

Wir wärs dann mit eme Gesundheitsbad im Brambes,

die Schwalbacher bade jo aach im Schlambes,

mer brauche uns gar nit zu scheniern
unn könne dann mit Schwalbach konkurriern!

Es träumten zwaa Bursche en süße Traum
da, wo das Vöglein singt im Lindenbaum

Entflammt von Lied und heil’gem Zorn,

nicht weit gar wohnt aaner von den Born.

Er träumt von Lied und Seligkeit,

doch die Braut – so weit – so weit-!

Schöne Worte im Liebesbrief –

Nichts kann nützen – alles geht schief!

Mer nennt so Leit Philister

Gell – des wißter:

Uff jeden Brief von ihm zu Haus,

bleibt nadierlich die Anwort aus.

In seiner Liebe is er blind,

schreibt schnell wo annerscht hie geschwind.

Schließlich muß er auch hier erleben,

dass auch diese is vergeben.

Er erlebt Fiasko blitzeschnell
Mensch – sei helle: bleib Junggesell!

Mein Schluß dem alten Brauterich,

der meistens spielt nur Versteckelches!

Ihr Musikante, mer wolle am anns driwwer bloose,

sonst – verliert er noch die Hose!!! – V i v a t!

Manch junger Borsch vom D.A.D. (Deutscher Arbeitsdienst)

duht sich de Barscheder Bauern in die Blanze leh:

Dort geihnse aach nor so lang hie,

bisse vom Schütz en Dappe krieh.

Iwwer Kartoffelacker unn Rommelplanze

führt die Spur uff die Mapper Schanze.

Owends stehn se so lang bei de Barscheder Mädcher
haamzuhs sehn se kaan Weg mieh unn aach kaa Mädcher.

Hätte unser Alte des frieher geahnt, des so vill Borsch uff die Schanz dehte komme,

dann hätte se beim Klapperstorch statt Buwe lauter Meedcher genumme!

Nix vor ungut, es war nit bös gemeent unn hoffentlich fühlt sich kaaner betroffe,

jetzt wird getanzt unn tüchtig gesoffe.

Seid froh unn munter, vergesst Eier Sorje,

bleibt noch e bische bei uns bis morje!

Und jetzt kimmt hinne draa

noch en Dusch vor die Gemaa!!!

Vivat! – Hoch! Hoch! Hoch!